保持精奇骨

保持精奇骨

後生嗰時打波、跑步同做Gym 真係可以做唔停。而家? 難得一班中坑滿心歡喜約埋踢場友誼波,點知熱完身,當年迷倒萬千女神嘅隊長巴迪斯圖華,已經話頂唔住!

 

原來隊長舊年係咁易仆一仆就整斷咗腳骨,後來先知係骨質疏鬆!四十幾就骨質疏鬆?

 

一般人就通常唔會咁早有,隊長就可能因為遺傳因素,咁後生就出現呢個問題。不過,佢話就算無遺傳都差唔多係時候要留意吓!骨質就好似感情一樣~逝去感情如何留得住~

 

教我如何補吓鈣

 

市場上嘅鈣片大概分為兩種,碳酸鈣同檸檬酸鈣。

1. 碳酸鈣有40%係鈣元素,而檸檬酸鈣就只有21%係鈣元素,所以通常一粒碳酸鈣嘅鈣含量會較高。要食幾多粒先夠就要計清楚啦。

2. 碳酸鈣一定要飽肚食先吸收得好。亦都留意返佢較易引起腸胃不適 ,好似腸胃氣脹、便秘咁,如果腸胃麻麻,檸檬酸鈣就比較適合喇。

3. 檸檬酸鈣空肚服用都吸收得好。

 

 

最後提提大家,小心揀鈣片嘅同時,減少吸煙、飲酒、咖啡對預防骨折都有幫助嘅。當然最好就做埋適量運動啦!但係針對骨頭健康,就要做負重運動先有用,例如太極、跑步;而游水呢種非負重運動對於骨頭健康就幫助不大啦!